تحقيقات: وصلة الدش ببلاش

شرايين مصر الجديدة
صحيت الصبح لقيت سلك أسود لذيذ واخد سطحنا بالحضن
طولاَ وعرضاَ فلأني مسالم قلت أكيد أمي ملقتش حبل فمشتها سلوك ونزلت أسألها قالتلي معرفش حاجة
فثارت جوايا أمارات الرجولة
حقنا سطحنا حدودنا الداخلية مياهنا الاقليمية انتهكت
الجلاء التام أو الوصلة تخشلنا م الحمام
فلقيت راجل يصطنع الطيابة والسذاجة
لا مؤاخذة يابيه دي وصلة الدش
عقبال عندك بنعمل مشروع دش مركزي في الحتة
بدل عم فلان الأولاني وده سلك كهربا والتاني تلفزيون
هنثبتهم عندكو ع السطح
طبعاَ كلمة حضرتك في المشهد ده
وهو واقف مترين ع السطح اللي جنبنا ومعاه وحوش الأسفلت
ممكن تترجم بكل لغات الإشارة تريقة
ويكون مصيري توربيني جديد أو تسجل القضية ضد مجهول
فقلت ياواد طنث خالث بس يافندم لامؤاخذة
أنا آسف سلك الكهربا اللطيف ده ماشي بعرض السطح والولاد صغيرين
قعد يكح ورد في بسالة ماتخافش هنرفعه
خدت الكلمة على قفايا وقعدت أزاكر باب الروافع
وبعد ماخلص نزل بصنعة لتافة
قاللي أشدلك سلك يابيه وخليها علينا
فبدأت أسترد عافيتي تاني وأحس ان الكرة في ملعبي من منطلق قوة
طبعا مش أنا اللي آخد حاجة ببلاش
عشرة جنيه كويس قاللي ماشي
مشهد انتهازي لذيذ وبدأت تنزل تترات الشجاعة
القنوات إيه رد طبعا محترمة
متخفش عندي عيال يا أستاذ
أصل حضرتك الوصلة التانية مش لطيفة
ماتخافش هنرفعهم
وفعلا بدأنا نتعايش مع الوصلة كل قنوات النيل المسلية جدا
وكل قنوات الدين مفيش مشاكل لازم برضه
وقناتين تلاتة ترفيه عادي لمدة شهر واحد
وعينك ماتشوف إلا النور ياسيدي كل المشفرات والمزعبلات
في كل الأوقات بتجيب محتاجاتياترى فين سلك النت م التليفون م الدش م الكهربا

نزلت الشارع لقيت خير اللهم اجعله خير ترسانة أسلحة على عمود الكهربا
زي شرايين القلب المفتوح وساعتها عربية الأنابيب كانت معدية
لقيت زعيق وقف ياسطى حاسب حوووش ياعم الحاج وإذ بصاحب الشبكة شايل مقشة
يرفع السلوك علشان العربية عالية
وكتب لوحة خشب على أول الشارع بالطباشير
ممنوع دخول عربيات الأنابيب اللي أطول م العمود
مع تحيات عم اسماعيل بتاع الوصلة

ونزلت أسأل أهل الحتة

طالب في كلية تجارة: والله أنا بحب الكرة قوي وبشوف الدوري الأوروبي عليها والوصلة أرخص من اشتراك القنوات الغالية دي

ربة منزل متعلمة: الوصلة لطيفة بس بتضيع وقت جامد والأولاد بيقعدوا قدامها كتيرفبضطر أركبها في الاجازة بس

ربة منزل غير متعلمة: شوف يابني أنا لقيت العيال بيروحوا يتفرجوا عند الجيران ولما سمعت إنها رخيصة قلت يبقوا قدامي وميتقلوش على حد

مهندس زراعي: هي مش مسألة حرام وحلال إنما الفكرة القنوات دي ممكن تجيب حاجات مش مظبوطة العيال تشوفها وأنا مش موجود

بقال: أنا جبتها في المحل علشان تسليني وكمان بتجيب قنوات دين وقرآن بسمعها وأنا قاعد

طالبة في ثانوي: بتجيب الأفلام اللي مش بنشوفها في السينما وكمان الاغاني الجديدة

بجد احترت انت رأيك ايه؟

يحيى .. حلاوة
أحـمـد عـلــــي